Уначы Расія атакавала Украіну беспілотнікамі, пусціўшы «шахеды» некалькімі хвалямі, а потым ударыла ракетамі «Калібр». Выбухі гучалі ў партовых гарадах Адэсе і Мікалаеве.
— Некалькі хваляў ударных дронаў былі скіраваныя на выяўленне і знясіленне сіл супрацьпаветранай абароны. А пасля гэтага з акваторыі Чорнага мора па Адэсе выпусцілі шэсць «Калібраў», — расказалі ў Аператыўным камандаванні «Поўдзень».
Усе ракеты былі знішчаныя сіламі супрацьпаветранай абароны. Абломкамі збітых ракет і выбухной хваляй у Адэсе пашкоджаныя аб’екты партовай інфраструктуры, некалькі прыватных домаўладанняў. Раненні атрымаў мужчына, ён шпіталізаваны.
Над Мікалаеўшчынай былі збітыя чатыры дроны-камікадзэ тыпу Shahed-136. Ёсць траплянне ў прамысловы аб’ект, у выніку чаго ўспыхнуў пажар. Ён быў аператыўна ліквідаваны. Пацярпелых няма, паведаміў кіраўнік вобласці Віталь Кім.
— Начная атака расіян на Адэсу і Мікалаеў з выкарыстаннем ракет і шахедаў — яшчэ адзін доказ таго, што краіна-тэрарыст хоча паставіць пад пагрозу жыццё 400 млн чалавек у розных краінах, якія залежаць ад украінскага харчовага экспарту, — пракаментаваў начны ўдар кіраўнік Офіса прэзідэнта Украіны Андрэй Ярмак.
Нагадаем, напярэдадні Расія заявіла, што з 18 ліпеня спыняе дзеянне збожжавай угоды.
