У Міністэрстве абароны Расіі заявілі, што ў Харкаўскай вобласці спынілі дзеянні дзвюх украінскіх дыверсійна-разведвальных груп. У Генштабе УСУ паведамілі, што расійскія войскі працягваюць весці наступальныя дзеянні ў раёне Бахмута. У амерыканскім Інстытуце па вывучэнні вайны разважаюць, як размяшчэнне расійскай тактычнай ядзернай зброі ў Беларусі паўплывае на сітуацыю.
Расказваем пра галоўнае са зводак штабоў і высноваў экспертаў на 457-ы дзень вайны ва Украіне.
Генштаб УСУ: Збілі расійскі самалёт Су-25
Мінулай ноччу расійскія войскі нанеслі чарговы ракетны і авіяцыйны ўдары па Украіне. Усяго за мінулыя суткі праціўнік нанёс чатыры ракетныя, 55 авіяцыйных удараў, зафіксаваныя і 19 абстрэлаў з рэактыўных сістэм залпавага агню. Ёсць траплянне ракетай С-300 па дамбе ў раёне Карлаўкі Данецкай вобласці, праз што існуе пагроза падтаплення размешчаных побач населеных пунктаў. Пра гэта паведамляе Генштаб УСУ ў ранішняй зводцы.
— Праціўнік працягвае засяроджваць асноўныя намаганні на Купянскім, Ліманскім, Бахмуцкім, Аўдзееўскім і Мар'інскім напрамках. За мінулыя суткі на гэтых участках адбыліся 22 баявыя сутыкненні.
— На Северскім і Слабажанскім напрамках расіяне з мінамётаў і артылерыі абстралялі 19 населеных пунктаў Чарнігаўскай, Сумскай і Харкаўскай абласцей.
— На Купянскім напрамку расійскія войскі не спыняюць спробаў палепшыць тактычнае становішча. Авіяўдары нанеслі па раёнах двух населеных пунктаў Харкаўскай вобласці. Беспаспяхова спрабавалі наступаць у раёне Масютоўкі. Артылерыйскім і мінамётным абстрэлам праціўніка падвергліся дзевяць населеных пунктаў на Харкаўшчыне і Луганшчыне.
— На Ліманскім напрамку расійскія войскі вялі беспаспяховыя наступальныя дзеянні ў раёне Белагораўкі Луганскай вобласці. Тамсама і каля Івана-Дар'еўкі Данецкай вобласці нанеслі авіяўдары. Артылерыйскім абстрэлам падвергліся восем населеных пунктаў Луганскай і Данецкай абласцей.
— На Бахмуцкім напрамку праціўнік працягвае весці наступальныя дзеянні ў раёне Бахмута. Ад абстрэлаў пацярпелі 13 населеных пунктаў Данецкай вобласці.
— На Аўдзееўскім напрамку расійскія войскі вялі беспаспяховыя наступальныя дзеянні ў кірунку Краснагораўкі. Нанеслі авіяўдары ў раёне Аўдзееўкі і Вадзянога. З артылерыі абстралялі тры населеныя пункты Данецкай вобласці.
— На Мар'інскім напрамку падраздзяленні Сіл абароны адбілі шматлікія атакі праціўніка ў раёне горада Мар'інка. Расійскія войскі задзейнічалі для ўдараў па Мар'інцы авіяцыю. Абстралялі два населеныя пункты Данецкай вобласці.
— На Шахцёрскім напрамку расіяне абстралялі тры населеныя пункты.
— На Запарожскім і Херсонскім напрамках расійскія войскі працягваюць весці абарончыя дзеянні. Нанеслі авіяўдары па раёнах чатырох населеных пунктаў. Абстралялі 23 населеныя пункты Запарожскай, Днепрапятроўскай і Херсонскай абласцей, а таксама горад Херсон.
— Авіяцыя Сіл абароны нанесла пяць удараў па раёнах канцэнтрацыі асабовага складу і ваеннай тэхнікі праціўніка.
— Збіты самалёт Су-25.
— Украінскія ракетчыкі і артылерысты пабілі пункт кіравання, зенітна-ракетны комплекс, два раёны канцэнтрацыі жывой сілы, склад боепрыпасаў, радыёлакацыйную станцыю і два артылерыйскія падраздзяленні на агнявых пазіцыях.
Мінабароны РФ: Перахапілі дзесяць HIMARS і дзве Storm Shadow
«Сёння ноччу Узброенымі сіламі Расійскай Федэрацыі нанесены групавы ўдар высокадакладнай зброяй вялікай далёкасці паветранага базавання па месцах захоўвання боепрыпасаў украінскіх войскаў. Мэта ўдару дасягнутая. Усе прызначаныя аб’екты пабітыя», — заявілі ў Міністэрстве абароны Расіі.
— На Купянскім напрамку агнём артылерыі Заходняй групоўкі войскаў пабітыя падраздзяленні УСУ ў раёнах населеных пунктаў Двурэчная і Кіслоўка Харкаўскай вобласці. У раёнах населеных пунктаў Масютаўка і Іванаўка Харкаўскай вобласці спыненыя дзеянні дзвюх украінскіх дыверсійна-разведвальных груп.
Страты УСУ склалі да 35 вайскоўцаў, тры аўтамабілі, а таксама гаўбіца «Мста-Б».
— На Чырвона-Ліманскім напрамку армейскай авіяцыяй і агнём артылерыі групоўкі войскаў «Цэнтр» нанесенае паражэнне падраздзяленням УСУ ў раёнах населеных пунктаў Кузьміно Луганскай вобласці і Ямпалоўка Данецкай вобласці. За суткі знішчаныя больш за 60 украінскіх вайскоўцаў, дзве баявыя браніраваныя машыны, два пікапы, самаходная артылерыйская ўстаноўка «Акацыя», а таксама гаўбіцы Д-20 і Д-30.
— На Данецкім напрамку ў выніку ўдараў авіяцыі, актыўных дзеянняў падраздзяленняў і агню артылерыі Паўднёвай групоўкі войскаў за суткі знішчаныя да 190 украінскіх вайскоўцаў, дзве баявыя браніраваныя машыны, тры пікапы, а таксама гаўбіца Д-30. У раёне населенага пункта Верхнякаменскае Данецкай вобласці знішчаны склад боепрыпасаў 54-й механізаванай брыгады УСУ.
— На Паўднёва-Данецкім і Запарожскім напрамках ударамі авіяцыі, агнём артылерыі групоўкі войскаў «Усход» нанесенае паражэнне падраздзяленням УСУ ў раёнах населеных пунктаў Арэхаў, Малая Такмачка Запарожскай вобласці і Навасёлка Луганскай вобласці.
За суткі на гэтых напрамках страты УСУ склалі звыш 120 вайскоўцаў забітымі і параненымі, а таксама чатыры аўтамабілі.
— На Херсонскім напрамку ў выніку агнявога паражэння за суткі знішчаныя да 30 украінскіх вайскоўцаў, пяць аўтамабіляў, гаўбіца Д-30, а таксама самаходная артылерыйская ўстаноўка «Акацыя».
Усяго за мінулыя суткі, паводле МА РФ, пабітыя 78 артылерыйскіх падраздзяленняў, жывая сіла і ваенная тэхніка УСУ ў 92 раёнах. У раёне населенага пункта Новамікалаеўка Мікалаеўскай вобласці знішчаная ўкраінская радыёлакацыйная станцыя выяўлення і суправаджэння малавышынных мэтаў «СТ-68УМ».
Сродкамі СПА перахопленыя: аператыўна тактычная ракета «Гром-2», дзесяць рэактыўных снарадаў сістэмы залпавага агню HIMARS, а таксама дзве крылатыя ракеты вялікай далёкасці Storm Shadow. Знішчаныя 20 украінскіх беспілотных лётных апаратаў.
Інстытут па вывучэнні вайны: Крэмль спрабуе пераканаць дзяржавы — чальцы ЕАЭС дапамагчы ва ўхіленні ад санкцый
Размяшчэнне ў Беларусі расійскай тактычнай ядзернай зброі наўрад ці прывядзе да эскалацыі сітуацыі. Пра гэта гаворыцца ў апошняй справаздачы амерыканскага Інстытута па вывучэнні вайны (ISW). Напярэдадні міністры абароны Шайгу і Хрэнін падпісалі ў Мінску дакументы пра размяшчэнне расійскай тактычнай ядзернай зброі на тэрыторыі Беларусі. Расія ўжо даўно мае ядзерную зброю, здольную ўразіць любую мэту, і ISW працягвае лічыць вельмі малаімаверным, што Пуцін выкарыстае яе ва Украіне ці дзе-небудзь яшчэ. Разам з тым эксперты адзначаюць, што размяшчэнне тактычнай ядзернай зброі ў Беларусі патрабуе значнай вайсковай прысутнасці Расіі. Крэмль, імаверна, збіраецца выкарыстоўваць гэтыя патрабаванні для далейшага падпарадкавання беларускай сферы бяспекі, лічаць у Інстытуце.
Што да сустрэчы Уладзіміра Пуціна ў Маскве 25 траўня з лідарамі краін — чальцоў Еўразійскага эканамічнага саюза (ЕАЭС) і кіраўнікамі дзяржаваў былога СССР, то ў Інстытуце лічаць, што гэта можа пашырыць для Масквы магчымасці абыходу санкцый.
Пуцін, Пашынян і Такаеў заклікалі да далейшага развіцця адносін ЕАЭС з трэцімі краінамі, у тым ліку да заключэння пагадненняў аб свабодным гандлі з Аб’яднанымі Арабскімі Эміратамі, Індыяй, Егіптам, Інданезіяй, Ізраілем і Іранам. Такаеў прапанаваў дапамагчы Расіі запусціць 2873-кіламетровую высакахуткасную грузавую чыгунку Чалябінск — Бальшак — Іран. Пуцін таксама заклікаў ЕАЭС ствараць тэхналагічныя альянсы з іншымі краінамі, імаверна, каб забяспечыць вытворчасць найважнейшых кампанентаў, якія Расія з усіх сіл спрабуе вырабляць ці набываць сама.
«Крэмль, імаверна, спрабуе пераканаць дзяржавы — чальцы ЕАЭС і іншыя постсавецкія краіны дапамагчы РФ ва ўхіленні ад санкцый і выбудоўванні лагістыкі супрацоўніцтва з Кітаем, Іранам і іншымі», — лічаць у ISW.
Эксперты таксама звярнулі ўвагу на заяву Яўгена Прыгожына пра вывад з 25 траўня сіл ПВК з пазіцый у Бахмуце і перадачы іх Міністэрству абароны Расіі. Застаецца незразумелым, ці зможа «Вагнер» вывесці ўвесь свой кантынгент да 1 чэрвеня, кажуць у Інстытуце.
На што яшчэ звярнулі ўвагу эксперты:
- расійскія войскі працягвалі абмежаваныя наземныя атакі на паўночны ўсход ад Купянска і на поўдзень ад Крамянной;
- расійскія сілы працягвалі абмежаваныя наземныя атакі вакол Бахмута, бо, як паведамляецца, сілы групы ПВК Вагнера пачалі адыход з прыфрантавых раёнаў горада;
- расійскія войскі працягвалі наземныя атакі на лініі Аўдзееўка — Данецк;
- расійскія крыніцы сцвярджалі, што расійскія войскі збілі шэсць беспілотнікаў над Крымам;
- паведамляецца, што расійскія сілы працягваюць набіраць папаўненне з рознымі захворваннямі;
- расійскія акупацыйныя ўлады працягваюць заяўляць пра партнёрства з кіраўнікамі расійскіх рэгіёнаў для павышэння ўзроўню жыцця на акупаваных тэрыторыях.