Расія 26 студзеня нанесла масіраваны ракетны ўдар па аб’ектах крытычнай інфраструктуры Украіны, выпусціўшы 55 ракет. Гэтаму папярэднічаў начны налёт дронаў. Паводле звестак украінскай Дзяржаўнай службы па надзвычайных сітуацыях, у выніку гэтых нападаў загінула як мінімум 11 чалавек.
Як паведаміў галоўнакамандуючы УСУ Валерый Залужны, расіяне для ўдару па Украіне выкарыстоўвалі высокадакладныя ракеты паветранага і марскога базавання: Х-101, Х-555, Х-47 «Кінжал», «Калібр», Х-59. Яны былі запушчаныя з самалётаў Ту-95, Су-35, МіГ-31К і караблёў, якія знаходзяцца ў акваторыі Чорнага мора.
— Сіламі і сродкамі супрацьпаветранай абароны Узброеных сіл Украіны знішчаныя 47 крылатых ракет, 20 з іх — у раёне сталіцы. Акрамя таго, тры з чатырох кіравальных авіяцыйных ракет Х-59 не дасягнулі сваіх цэляў, — расказаў Залужны.
Паветранае камандаванне «Поўдзень» паведаміла, што над Адэскай вобласцю былі збітыя тры ракеты, над Мікалаеўскай — 13 і сем — над Херсонскай.
— Адзначыліся падраздзяленні Херсонскай зенітнай ракетнай брыгады, знішчылі 20 варожых паветраных цэляў.
Паветраная трывога доўжылася каля чатырох гадзін. У некалькіх абласцях краіны былі зафіксаваныя траплянні расійскіх ракет, паведаміў спікер Паветраных сіл УСУ Юрый Ігнат.
Паведамлялася пра прылёты ў Вінніцкай, Адэскай, Кіеўскай абласцях, а таксама Кіеве. Так, у Адэскай вобласці пацярпелі два аб’екты крытычнай інфраструктуры. У Кіеўскай вобласці — аб’екты цывільнай інфраструктуры, прыватныя дамы, шматпавярхоўкі, аўто. У асноўным гэта выбітыя вокны, пашкоджаныя дахі і фасады.
У Кіеве ў выніку прылёту ў нежылы дом загінуў 55-гадовы мужчына, яшчэ два чалавекі атрымалі раненні.
Усяго ў выніку расійскіх удараў загінула 11 чалавек, заявіў у эфіры тэлемарафона прэс-афіцэр Дзяржаўнай службы Украіны па надзвычайных сітуацыях Аляксандр Харунжы.
— Сёння ў выніку тэрарыстычных нападаў РФ як дронамі, так і ракетамі былі ўдары ў 11 абласцях. Пацярпелі 11 чалавек і загінулі таксама 11 чалавек. Гэта інфармацыя па стане на 15.00 (кіеўскі час. — Заўв. рэд.), — адзначыў ён.
Энергетыкі паведамляюць, што самая складаная сітуацыя з электраэнергіяй у Кіеве, Кіеўскай, Адэскай і Днепрапятроўскай абласцях. Аднак дзякуючы аператыўным рамонтным працам ужо ўдалося аднавіць падачу энергіі крытычнай інфраструктуры Адэсы. У Кіеве ад экстранных адключэнняў перайшлі да планавых.
Нагадаем, мінулы масіраваны расійскі ракетны абстрэл Украіна перажыла 14 студзеня. Тады адна з ракет трапіла ў жылы дом у Дняпры. Загінулі 44 чалавекі, самай маленькай ахвяры не было яшчэ і года. Пацярпела 79 чалавек, з іх 16 дзяцей.
Выратавальныя працы працягваліся тры дні. З-пад завалаў вызвалілі 39 чалавек, з іх 6 дзяцей.
