На вайне ва Украіне загінула беларуска Марыя Зайцава, паведаміў «Люстэрку» былы добраахвотнік.
«Маша ваявала ў другім інтэрнацыянальным легіёне, на вайне была даўно. У яе былі раненні, яна ўжо лячылася ў Чэхіі, потым зноў вярнулася на фронт», — расказаў суразмоўца.
Марыя Зайцава родам з Гомеля. У 19 гадоў дзяўчына трапіла ў рэанімацыю бальніцы хуткай дапамогі ў Мінску. Яна атрымала цяжкія траўмы пасля сілавога разгону пратэстаў у раёне стэлы «Мінск — горад-герой» 9 жніўня 2020 года.
СМІ ў 2020 годзе абляцеў здымак скрываўленай дзяўчыны. Марыя расказвала ў інтэрв'ю TUT.BY, што той момант памятае кепска: яе аглушыла і асляпіла святлошумавой гранатай. У бальніцы ёй дыягнаставалі чэрапна-мазгавую траўму і кровазліццё, выцятыя раны скроні і пляча, знайшлі асколак у воку, кантузію вока і кровазліццё ў ім жа, асколачныя раненні павека, выбуховую траўму, разрыў барабаннай перапонкі, а таксама парушэнні ў працы правага локцевага нерва і парэз (аслабленне цягліц) двух пальцаў правай рукі.
У дзень выпіскі з бальніцы, 1 кастрычніка 2020 года, Марыя з’ехала ў Чэхію, дзе ёй прапанавалі прайсці рэабілітацыю, а галоўнае — аднавіць слых. Менавіта з гэтым узнікла больш за ўсё праблем.
Яшчэ адным сур’ёзным наступствам траўмаў 9 жніўня стала гематома ў мозгу. Праз гэта ў Марыі былі праблемы з памяццю.
