Работніка мінскага завода затрымалі за чатыры лічбы на вопратцы, якія расшыфроўваюцца як ACAB. «Пакаяльнае» відэа з ім з’явілася ў тэлеграм-канале, блізкім да ГУБАЗіК.
У змантаваным роліку сілавікоў мужчына кажа, што працуе зваршчыкам на Менскім маторным заводзе і «быў фанатам» футбольнай каманды «Нёман Стоўбцы».
Паводле сілавікоў, мужчына «ніяк не мог развітацца са сваім фанацкім жыццём у сацсетках» і быў затрыманы на працы. Прычынай стала сімволіка 1312 на яго вопратцы.
Лічба 1312 расшыфроўваецца як ACAB (паводле нумару літары ў алфавіце), а ўжо гэтая абрэвіятура значыць All Cops Are Bastards («Усе копы — вырадкі») і служыць лозунгам, які даўно функцыянуе ў субкультуры скінхэдаў. Яна шырока выкарыстоўваецца сярод футбольных хуліганаў, у тым ліку як тату.
За што канкрэтна быў затрыманы мужчына, сілавікі традыцыйна не паведамілі, аднак адзначылі, што «за распаўсюд экстрэмісцкіх матэрыялаў было складзена некалькі пратаколаў», а мужчыну адправілі сядзець «суткі» ў ізалятары часовага ўтрымання.
Нагадаем, гэта не першае затрыманне праз ACAB. Так, у ліпені паведамлялася, што мінчуку стала кепска на вуліцы, ён папрасіў дапамогі ў сілавікоў, а тыя заўважылі ў яго тату з гэтай абрэвіятурай і прымусілі выправіць. У траўні стала вядома, што сланімчанку затрымалі за «распаўсюд фота свайго хлопца» з татуіроўкай ACAB — тады ўзялі і мужчыну. Падобныя выпадкі адбываліся і раней.
У спісе «экстрэмісцкіх матэрыялаў» ACAB фігуруе з 2019 года як частка забароненых матэрыялаў, а не як самастойны пункт.
Чытайце таксама
