Пракуратура Віцебска накіравала ў суд крымінальную справу мясцовага жыхара — яго абвінавачваюць у «абразах» Аляксандра Лукашэнкі, якія ён выкрыкваў у тралейбусе «ў сувязі з наяўнымі ў яго палітычнымі і ідэалагічнымі поглядамі». Пра гэта паведамляе прэс-служба ведамства.
Згодна з матэрыяламі справы, 41-гадовы жыхар Віцебска 6 ліпеня гэтага года, знаходзячыся ў тралейбусе № 12, праязджаючы па праспекце Фрунзе ў абласным цэнтры, «у прысутнасці сведак, у сувязі з наяўнымі ў яго палітычнымі і ідэалагічнымі поглядамі», «публічна абразіў, то-бок прынізіў гонар і годнасць асобы» Аляксандра Лукашэнкі, «прамовіўшы неаднаразова слоўныя выказванні ў яго адрас, якія ўтрымлівалі негатыўную ацэнку і мелі ненарматыўную форму маўленчага выказвання, прыніжалі аўтарытэт, гонар і годнасць асобы» палітыка, і тым самым публічна яго абразіў.
У пракуратуры адзначылі, што мужчына знаходзіўся ў стане алкагольнага ап’янення. Там таксама заявілі, што мужчына «раней 10 разоў прыцягваўся да крымінальнай адказнасці, нідзе не працуе, злоўжывае спіртнымі напоямі і вядзе антыграмадскі лад жыцця».
Жыхару Віцебска інкрымінуюць публічную абразу Аляксандра Лукашэнкі (ч.1 арт. 368 КК Беларусі). Ён знаходзіцца пад вартай. Яму пагражае да чатырох гадоў пазбаўлення волі.