Прэзідэнт Расіі Уладзімір Пуцін 5 снежня распарадзіўся падпісаць дамову з Беларуссю пра гарантыі бяспекі ў рамках Саюзнай дзяржавы.
Дакумент дае МЗС РФ права падчас перамоваў з беларускім бокам уносіць у праект змяненні, «якія не маюць прынцыповага характару».
«Лічыць мэтазгодным ажыццявіць падпісанне дамовы, прадугледжанай гэтым распараджэннем, на найвышэйшым узроўні», — гаворыцца ў дакуменце.
Нагадаем, аналагічны дакумент Аляксандр Лукашэнка падпісаў 4 снежня. Указам № 453 ён ухваліў у якасці асновы для правядзення перамоваў праект дамовы паміж Беларуссю і Расіяй наконт гарантый бяспекі ў рамках Саюзнай дзяржавы.
На правядзенне перамоваў па праекце гэтага дакумента было ўпаўнаважанае Міністэрства замежных справаў.
Раней намеснік міністра замежных справаў Беларусі Ігар Назарук расказаў, што дакумент «раскрывае тэмы дзяржаўнай, грамадскай і эканамічнай бяспекі, кажа пра забяспечанне стабільнасці ў развіцці эканомік дзвюх дзяржаваў».
Ён удакладніў, што ў канцэпцыі бяспекі СД прапісаныя «агульныя напрамкі забяспечання бяспекі, а рэалізацыя палажэнняў вызначаецца дакументамі іншага парадку».