Экс-кіраўніца ЦВК Беларусі Лідзія Ярмошына падзялілася з Tochka.by сваім меркаваннем пра тое, які час для выбараў прэзідэнта яна лічыць самым прыдатным у 2025 годзе.
— Я абсалютна згодная з Іосіфам Вісарыёнавічам Сталіным, які называў аптымальным часам, па сутнасці, два месяцы — лістапад і сакавік, — заявіла экс-старшыня Цэнтрвыбаркама.
Паводле выбарчага заканадаўства выбары ў Беларусі мусяць быць прызначаныя не пазней чым за пяць месяцаў да даты і пры гэтым ім прайсці да 20 ліпеня 2025 года, таму найбліжэйшы лістапад у гэтым выпадку не падыходзіць.
— Думаю, што сакавік быў бы ідэальным часам, — рэзюмавала Ярмошына.
Раней аб’яднанне былых сілавікоў BELPOL паведаміла, што беларускія ўлады вырашылі правесці прэзідэнцкія выбары 23 лютага 2025 года.
«Падрабязныя планы „выбарчай кампаніі“ ўжо распрацаваныя, у пачатку жніўня 2024 года ва ўсіх аблвыканкамах Беларусі прайшла іх „абарона“, прычым мерапрыемствы былі зашыфраваныя пад „падрыхтоўку да новага навучальнага года“», — заявілі ў арганізацыі.
Аляксандр Лукашэнка назваў агучаную BELPOL інфармацыю «інсінуацыямі», але даты блізкіх выбараў не назваў. Цяперашні кіраўнік ЦВК Ігар Карпенка сказаў, што разглядаюцца чатыры магчымыя даты, але таксама іх не абвясціў.
Паводле закона выбары прэзідэнта прызначаюцца Палатай прадстаўнікоў Нацыянальнага сходу Рэспублікі Беларусь не пазней чым за пяць месяцаў і праводзяцца ў нядзелю не пазней чым за два месяцы да заканчэння тэрміну паўнамоцтваў дзейнага прэзідэнта. Такім чынам, наступныя прэзідэнцкія выбары ў краіне мусяць прайсці не пазней за 20 ліпеня 2025 года.