Лідарка беларускіх дэмакратычных сіл Святлана Ціханоўская атрымала ананімнае паведамленне, у якім гаварылася, што яе муж Сяргей памёр у жодзінскай турме. Пра гэта палітык напісала ў сябе ў Twitter познім вечарам 3 ліпеня.
«Сёння я атрымала вельмі дзіўнае і жудаснае паведамленне. Невядомы чалавек напісаў, што мой муж, Сяргей, памёр у турме Жодзіна. Няма ніякіх сведчанняў ці доказаў, што гэта праўда», — напісала Святлана Ціханоўская.
Палітык падкрэсліла, што такія чуткі распаўсюджваліся і раней.
«Я не ведаю, як гэта пракаментаваць. Я нічога не чула пра Сяргея з 9 сакавіка, і адвакатам адмаўляюць у доступе да яго», — напісала палітык.
Ціханоўская адзначыла, што ў такой жа сітуацыі знаходзяцца родныя Віктара Бабарыкі, Марыі Калеснікавай, Мікалая Статкевіча, Паўла Севярынца, Ігара Лосіка, Максіма Знака і іншых палітвязняў.
Нагадаем, пра такі спосаб ціску на сваякоў палітвязняў раней расказваў экс-супрацоўнік ГУБАЗіК і прадстаўнік фонду BYPOL Станіслаў Лупаносаў. У верасні 2021 года па тэлеграм-каналах запусцілі фэйк пра тое, што ў СІЗА Жодзіна памёр яго брат, якога затрымалі сілавікі за месяц да гэтага. Інфармацыя не пацвердзілася.
— Гэта зразумела было на каго разлічана: на мяне і на тыя кантакты, з кім я падтрымліваю адносіны. Я пра гэта адразу сказаў людзям, якія мне гэтую інфармацыю скінулі: «Гэта разлічана на тое, каб вылічыць мае кантакты». Так яно і атрымалася. Яны шукалі спосаб знайсці, з кім я камунікую, з кім падтрымліваю адносіны, — сказаў Лупаносаў у праграме «Ток».
Чытайце таксама
