Аляксандр Лукашэнка сабраў усе наратывы Крамля, але пры гэтым прымудрыўся заблытацца. Так пракаментавалі «Люстэрку» заявы Лукашэнкі падчас звароту да народа і парламента дэпутаты Вярхоўнай рады Украіны. Не вераць украінскія народныя дэпутаты і ў шчырасць прапановаў пра спыненне баявых дзеянняў.
— Мінскі дыктатар проста сабраў у кучу ўсе асноўныя наратывы расійскай прапаганды. Прычым нават у гэтым зусім заблытаўся. Так, напрыклад, акупацыю і спробу анексіі Крыма Расіяй Лукашэнка спрабуе апраўдаць міфічнай пагрозай бяспецы Расіі, хоць крамлёўскі дыктатар і ягоная прапаганда агучвалі хлуслівае сцверджанне пра нібыта права на самавызначэнне «народа Крыма», — заявіў кіраўнік Камітэта Вярхоўнай рады Украіны па замежнай палітыцы і міжпарламенцкім супрацоўніцтве Аляксандр Меражко.
Меражко таксама назваў ілжывымі заявы Лукашэнкі пра тое, што Украіна забараняла рускую мову і прапаноўвала NATO размясціць вайсковыя базы на сваёй тэрыторыі. Дэпутат адзначыў, што гэта супярэчыць Канстытуцыі Украіны.
— То-бок кожны тэзіс Лукашэнкі — хлуслівы. Ён перайшоў да бессаромнай і хлуслівай апалогіі злачынстваў расійскага тэрарыстычнага рэжыму, — лічыць Меражко.
«Кажа тое, што хоча пачуць Пуцін»
Дэпутат Вярхоўнай рады Аляксей Ганчарэнка сказаў, што не верыць у шчырасць жадання Мінска дабівацца спынення баявых дзеянняў, і вось чаму:
— Лукашэнка, як звычайна, выконвае сваю ролю — кажа тое, што хоча [пачуць] Пуцін. Ён цалкам падкантрольны Пуціну, якія марыць замарозіць [сітуацыю], бо ён выматаўся і хоча цяпер спыніцца, каб перагрупавацца, пераўзброіцца. Менавіта гэта і агучвае Лукашэнка.
Пры гэтым, звяртае ўвагу ўкраінскі дэпутат, Лукашэнка тут жа заяўляе пра гатоўнасць выступіць у якасці ядзернага плацдарма Расіі.
— Лукашэнка — гэта проста блазан пры двары імператара Пуціна (як ён сябе адчувае), — заявіў «Люстэрку» Аляксей Ганчарэнка.
Аляксандр Лукашэнка падчас сённяшняга выступу паўтарыў крамлёўскія наратывы пра тое, што першапрычынай цяперашніх падзей ва Украіне стаў «дзяржаўны пераварот» (так услед за Пуціным ён назваў Майдан 2014 года). Заявіў, што пасля гэтага Украіна загразла ў карупцыі і галечы, у краіне пачалі забараняць рускую мову і «знішчаць усё звязанае з перыядам Савецкага Саюза, гераічнага мінулага», а «знешнепалітычным трэндам ва Украіне стала ўступленне ў NATO і прапанова Паўночнаатлантычнага блоку размясціць яго вайсковыя базы на тэрыторыі краіны». «Улічваючы надзвычайную пагрозу бяспецы, Расійская Федэрацыя вымушаная была пайсці на надзвычайныя захады», — практычна словамі Пуціна апраўдаў Лукашэнка спачатку анексію Крыма, а потым і агрэсію ў дачыненні да суверэннай дзяржавы. У развязванні вайны ён прадказальна абвінаваціў ЗША і іх «сатэліты».
