У Міністэрстве па падатках і зборах расказалі, якія новаўвядзенні па падатках ужо дакладна ўвядуць у 2023 годзе. Сярод іх — скасаванне спрошчанай сістэмы падаткаабкладання для прадпрымальнікаў. У наступным годзе таксама павысяць стаўкі акцызаў на алкаголь і цыгарэты, што, як правіла, суправаджаецца ростам рознічных цэн на гэтыя тавары. Пры гэтым у ведамстве ўдакладняюць, што плануюцца і іншыя змены ў Падатковы кодэкс (пра многія з іх мы пісалі раней).
Індывідуальныя прадпрымальнікі з 1 студзеня 2023 года не змогуць працаваць па спрошчанай сістэме падаткаабкладання, нагадваюць у МПЗ. У ведамстве ўдакладняюць, што ІП змогуць скарыстацца двума іншымі варыянтамі па падатках:
— агульны парадак падаткаабкладання, які прадугледжвае выплату падаходнага падатку з фізічных асоб);
— сістэма выплаты адзінага падатку з ІП і іншых фізічных асоб.
Нагадаем, ІП, якія аказваюць паслугі, ужо з гэтага года не могуць прымяняць спрошчаную сістэму падаткаабкладання. Выключэнне зрабілі для тых, хто працуе ў сферы аховы здароўя, сухапутнага транспарту, галіне камп’ютарнага праграмавання, а таксама аказвае паслугі па грамадскім харчаванні і турыстычнай дзейнасці.
У 2023 годзе ў спіс падакцызных тавараў уключаць электронныя сістэмы курэння, а таксама сістэмы для спажывання тытуню. Стаўка акцызаў складзе 2,72 рубля за 1 штуку.
Таксама ў наступным годзе павысяць стаўкі акцызаў на алкаголь і цыгарэты, паведамляюць у МПЗ. Але ў ведамстве не ўдакладняюць, колькі складзе прыбаўка. Павышэнне ставак акцызаў, як правіла, суправаджаецца ростам рознічных цэн на гэтыя тавары.
Беларускія арганізацыі і ІП абавяжуць плаціць НДС за тавары (работы, паслугі), калі іх замовяць у нашай краіне ў замежных ІП, якія не знаходзяцца на падатковым уліку ў Беларусі. У МПЗ удакладняюць, што цяпер «такі абавязак ускладзены на беларускіх платнікаў толькі калі купля здзяйсняецца ў замежных арганізацый, якія не знаходзяцца на ўліку ў падатковых органах Беларусі». То-бок угодаў з удзелам замежных ІП цяпер гэтае патрабаванне не датычыць.
Таксама для бізнесу ўвядуць асаблівы парадак вылічэння ПДВ у некаторых угодах. Сярод іншага гэта датычыць сітуацый, калі набытыя менш за год таму тавары прадаюцца па цане, ніжэйшай за закупачную. «Падатковая база вызначаецца як кошт набыцця. Пры гэтым прадугледжаныя выключэнні як для асобных тавараў, так і для асобных аперацый, якія здзяйсняюцца з таварамі», — удакладняюць у МПЗ.
У ведамстве таксама расказалі, што ў 2023-м увядуць абмежаванне на вылічэнне сумаў ПДВ па пакупках за кошт сродкаў бязвыплатнай або спонсарскай дапамогі.
Чыноўнікі таксама падрыхтавалі змены для аўтаперавозчыкаў. «Змяняецца парадак вызначэння падатковай базы ПДВ для беларускіх аўтамабільных перавозчыкаў, калі міжнародная перавозка грузаў выконваецца паслядоўна некалькімі перавозчыкамі. Падатковая база, якая абкладаецца ПДВ па нулявой стаўцы, у тым ліку ва ўмовах санкцый Еўрасаюза, будзе вызначацца як перавозка, выкананая беларускім перавозчыкам уласнымі сіламі», — паведамляюць у МПЗ.
