17-гадовая беларуска Вікторыя Нікалаева ў канцы кастрычніка стала абсалютнай чэмпіёнкай на сусветным першынстве па шашках у Грузіі, выйграўшы адразу ў трох катэгорыях. Такога ў сусветнай гісторыі шашак яшчэ не было. Пра сваю перамогу, трэніроўкі і мянушку «Небяспечная Віка» дзяўчына распавяла газеце «Звязда».
Бацькі адвялі Вікторыю на шашкі ў пяць гадоў, а ў 14 яна ўжо пачала выступаць на дарослых першынствах. На чэмпіянаце ў Эстоніі ў мінулым годзе яна здолела заняць другое месца ў імгненнай праграме, а ў цяперашнім — выйграць адразу ў трох катэгорыях: хуткай, імгненнай і класічнай.
У фінале Віка адолела чэмпіёнку Расіі Ніку Леапольдаву. Прызнаецца, што на першае месца нават не разлічвала: спадзявалася патрапіць хіба што ў прызёры.
Перад чэмпіянатам свету дзяўчына кожны дзень трэніравалася ў Рэспубліканскім цэнтры алімпійскай падрыхтоўкі, у нядзелю займалася дома самастойна.
— Падрыхтоўка ў асноўным такая ж, як і да іншых спаборніцтваў: спачатку я рашала камбінацыі, потым — пазіцыі, пасля — трэніровачныя партыі. І тэорыі даводзілася аддаваць увагу, — распавяла Вікторыя, якая да таго ж вучыцца ў 11-м класе гімназіі.
Пераможцы чэмпіянату Беларусі едуць на чэмпіятат свету за кошт федэрацыі. На чэмпіянаце свету ў Грузіі быў свой прызавы фонд — 30 тысяч долараў, які дзяліўся на шэсць турніраў (тры сярод жанчын і тры сярод мужчын). Грашовае ўзнагароджанне атрымалі ўсе пераможцы, у тым ліку беларуска.
А мянушку «Небяспечная Віка» яна атрымала яшчэ ў 11 гадоў — на этапе Кубка свету ў Санкт-Пецярбургу ў 2016 годзе:
— Там я добра згуляла ў імгненнай праграме і сярод жанчын таксама заняла першае месца. З дарослымі сапернікамі было складана гуляць, але ў мяне была адна перавага: амаль ніхто мяне не ведаў. Усе лічылі мяне маленькай дзяўчынкай і разлічвалі, што партыя са мной будзе лёгкай прагулкай. А я змагла выйграць.