Цана расійскай нафты маркі Urals знізілася да 52,76 даляра за барэль і набліжаецца да 50 даляраў — мінімуму амаль за два гады. Апошні раз галоўны экспартны гатунак Urals апускаўся ніжэй за гэтую адзнаку ў чэрвені 2023 года, піша Bloomberg. Падрабязнасці расказвае The Bell.
У Крамлі прызналі, што сітуацыя «напружаная і бурлівая», і паабяцалі зрабіць усё магчымае, каб змякчыць наступствы для эканомікі.
Прычынай падзення сталі новыя амерыканскія пошліны і планы АПЕК+ павялічыць здабычу. Ціск на рынак таксама ўзмацніла рашэнне Саудаўскай Аравіі знізіць экспартныя цэны на сваю нафту.
Нафтагазавыя даходы складаюць значную частку расійскага бюджэту: у студзені — лютым бюджэт на 30% складаўся даходаў ад нафты і газу, нагадвае Bloomberg. У сакавіку Мінфін РФ ужо перагледзеў прагноз на 2025 год і цяпер чакае, што сярэдняя цана нафты складзе ўсяго 60 даляраў за барэль замест запланаваных у бюджэце 70. Пры такім сцэнары, прагназуе ведамства, дэфіцыт расійскага бюджэту павялічыцца, але не перавысіць 1% ВУП. Цяперашняе падзенне выходзіць за межы гэтага абноўленага прагнозу.
Як цяперашняе падзенне ацэньваюць эксперты
На думку аналітыкаў, цана расійскай нафты Urals можа застацца блізу 60 даляраў за барэль найбліжэйшым часам. Усё будзе залежаць ад развіцця гандлёвых канфліктаў і перамоваў па пошлінах, лічыць дырэктар па даследаваннях нафтавых рынкаў Energy Intelligence Абхі Раджэндран.
Сярод фактараў, якія могуць паўплываць на расійскі экспарт, Аляксандр Ісакаў з Bloomberg Economics адзначае зніжэнне шанцаў на аднаўленне паставак у ЕС на фоне спробаў блока знізіць дысбаланс гандлю з ЗША і павелічэнне зніжак на расійскую нафту для іншых пакупнікоў.
Аднак не ўсе эксперты лічаць сітуацыю крытычнай. Наталля Мільчакова з Freedom Finance Global падкрэслівае, што Расія па-ранейшаму мае ўстойлівы попыт з боку Кітая і Індыі: «Асноўныя пакупнікі расійскай нафты — Кітай і Індыя, якія пры падзенні цаны расійскай нафты ў вобласць 60 даляраў за барэль будуць значна павялічваць імпарт нафты з РФ ніжэйшай цаной у стратэгічны рэзерв».
Чытайце таксама
