Абраны прэзідэнт ЗША Дональд Трамп прызначыў прэс-сакратаром Белага дома 27-гадовую Кэралайн Лівіт, паведамляе CNN. Яна стане самым маладым прэс-сакратаром у гісторыі.
Да гэтага Лівіт прадстаўляла яго падчас перадвыбарнай кампаніі, а падчас першага прэзідэнцкага тэрміну Трампа была памочніцай прэс-сакратара.
Паводле рэспубліканца, Ливит зрабіла «фенаменальную працу» ў яго кампаніі. Ён назваў яе «разумнай і жорсткай», а таксама падкрэсліў, што яна «эфектыўны камунікатар».
«Я абсалютна ўпэўнены, што яна мае поспех на трыбуне і дапаможа данесці нашае пасланне амерыканскаму народу, калі мы зноў зробім Амерыку вялікай», — заявіў Трамп.
Пра Лівіт таксама вядома, што пасля працы ў Белым доме памочніцай прэс-сакратара і ва ўпраўленні прэзідэнцкай карэспандэнцыі падчас першай адміністрацыі Трампа яна балатавалася ў Кангрэс у Нью-Гэмпшыры ў 2022 годзе, а таксама была прэс-сакратаркай прадстаўніцы Элізы Стэфанік з Нью-Ёрка, саюзніцы Трампа і яго кандыдаткі на пасаду амбасадаркі ў Арганізацыі Аб’яднаных Нацый (ААН).
27-гадовая Лівіт стане самым маладым прэс-сакратаром Белага дома: паб’е рэкорд Рона Зіглера, які заняў гэтую пасаду ва ўзросце 29 гадоў за прэзідэнтам Рычардам Ніксанам.
Цяпер пасаду прэс-сакратаркі Белага дома займае Карын Жан-П'ер. Яна стала першай цемнаскурай жанчынай, прадстаўніцай ЛГБТ-супольнасці на гэтай пасадзе. Акрамя таго, Жан-П'ер з 7 кастрычніка 2024 года працуе старшай дарадцай прэзідэнта Джо Байдэна.
Чытайце таксама
