У нядзелю вадалазы замацавалі другі трос на бронемашыне, затанулай у балоце на палігоне ў Пабрадэ, паведаміла камандаванне арміі ЗША ў Еўропе і Афрыцы. У панядзелак раніцай, 31 сакавіка, аперацыя была завершаная, расказала міністр абароны Давіле Шакалене ў эфіры LRT.
Работы па даставанні машыны былі завершаныя каля 04.30.
«Былі задзейнічаныя дзве машыны M88 і дадаткова два бульдозеры для фіксацыі, бо наяўнай тэхнікі аказалася недастаткова. Цяпер на месцы працуюць амерыканскія следчыя і вайсковая паліцыя Літвы. Больш інфармацыі пра сітуацыю даць не можам», — сказала Шакалене.
«Інфармацыі пра вайскоўцаў пакуль няма, але ў нас ёсць дакладнае пагадненне, што першым пра гэта паведамяць прадстаўнікі ЗША», — дадала міністр.
«Усе адчулі велізарную палёгку — самы складаны этап аперацыі пройдзены. Гэта была першая і самая цяжкая частка», — адзначыла яна.
Нагадаем, 25 сакавіка на вайсковым палігоне ў Пабрадэ падчас вучэнняў знікла гусенічная бронемашына M88 Hercules з чатырма амерыканскімі вайскоўцамі. На наступны дзень стала вядома, што машына затанула ў балоце. Яна знаходзілася на глыбіні чатырох метраў, а зверху ляжаў двухметровы пласт глею. Вядомае імя аднаго са зніклых вайскоўцаў — гэта Дантэ Гога Тайтана з вострава Гуам.