У Беларусі з’явіліся два валютныя новаўвядзенні. Адно з іх датычыць насельніцтва, другое — бізнесу. Расказваем падрабязнасці.
Страхоўкі ў даляравым эквіваленце
У дзяржаўнай кампаніі «Стравіта» да 1 снежня дзейнічае магчымасць заключаць дамовы страхавання жыцця і дадатковай пенсіі ў даляравым эквіваленце. Але ёсць важны момант: каб скарыстацца такой магчымасцю, патрэбная дзейная дамова па схеме «3 + 3».
З 1 кастрычніка 2022 года работнікі пры жаданні могуць плаціць страхавы ўнёсак на дадатковую назапашвальную пенсію — да 10% ад свайго заробку. Наймальнікі абавязаныя ў такім выпадку пералічваць на гэты рахунак яшчэ да 3%. Прычым ёсць нюанс: працадаўца мусіць пералічваць такі ж працэнт, як і працаўнік, але не больш за 3%. Да прыкладу, калі спецыяліст кампаніі вырашыць уносіць на дадатковую пенсію 2% ад свайго заробку, то столькі ж мусіць дадаць і наймальнік. А калі работнік абярэ тарыф на 5%, то наймальнік «накіне» максімальныя 3%. Гэтую страхоўку называюць таксама «3 + 3», яе можна аформіць праз кампанію «Стравіта».
Як растлумачылі ў кантакт-цэнтры «Стравіты», тым, хто аформіць страхоўкі ў далярах, усё роўна трэба будзе ажыццяўляць плацяжы па іх у беларускіх рублях — паводле курсу Нацбанка. «Прывязка ідзе да валюты. Сродкі назапашваюцца ў валюце, а выплаты атрымліваюцца ў беларускіх рублях (у пераліку на даляры паводле курсу Нацбанка. — Заўв. рэд.)», — паведамілі ў страхавой кампаніі.
Нагадаем, «Стравіта» 1 кастрычніка 2023 года прыпыніла заключэнне дамоваў страхавання ў далярах. У мінулым месяцы такую магчымасць вярнулі па полісах страхавання жыцця і дадатковай пенсіі.
Валютнае новаўвядзенне для экспарцёраў
Урад і Нацбанк да канца 2025 года падоўжылі дазвол беларускім экспарцёрам атрымліваць ад нерэзідэнтаў аплату ў замежнай валюце ў наяўнай форме. Гаворка пра даляры, еўра і кітайскія юані.
Такая магчымасць з’явілася летам 2022-га праз санкцыйныя абмежаванні, праз якія былі цяжкасці з грашовымі пераводамі.
Чытайце таксама
