Сталі вядомыя імёны ўсіх патэнцыйных кандыдатаў у прэзідэнты Беларусі

Сёння на паседжанні ЦВК разгледзелі пытанні пра рэгістрацыю ініцыятыўных груп грамадзян у падтрымку кандыдатаў у прэзідэнты Рэспублікі Беларусь. Такім чынам, 4 лістапада стаў вядомы канчатковы спіс кандыдатаў у прэтэндэнты на выбарах.

Раней ЦВК Беларусі зарэгістраваў ініцыятыўныя групы Аляксандра Лукашэнкі, дэпутата і лідара Ліберальна-дэмакратычнай партыі Беларусі Алега Гайдукевіча, кіраўніка Рэспубліканскай партыі працы і справядлівасці Аляксандра Хіжняка і былой прэс-сакратаркі МУС Вольгі Чамаданавай.

Сёння, 4 лістапада, былі зарэгістраваныя ініцыятыўныя групы экс-кандыдаткі ў прэзідэнты Беларусі ў 2020 годзе Ганны Канапацкай, старшыні Рэспубліканскага савета Беларускага саюза афіцэраў (БСА) Сяргея Бобрыкава, першага сакратара ЦК КПБ Сяргея Сыранкова.

Прадпрымальніцы Дыяне Кавалёвай у рэгістрацыі яе ініцыятыўнай групы адмовілі: яна набрала 85 чалавек (неабходна 100), звесткі астатніх прызналі недакладнымі. Таксама адмовілі Віктару Куляшу: ён не падаў спісу сябраў ініцыятыўнай групы, а толькі заяву.

Такім чынам, прэтэндэнтамі на ролю кандыдатаў на выбарах-2025 сталі сем чалавек. Іх ініцыятыўныя групы з 7 лістапада могуць прыступаць да збору подпісаў:

1. Аляксандр Лукашэнка.
2. Алег Гайдукевіч.
3. Аляксандр Хіжняк.
4. Вольга Чамаданава.
5. Ганна Канапацкая.
6. Сяргей Бобрыкаў.
7. Сяргей Сыранкоў.

Нагадаем, першай 26 кастрычніка падала пакет неабходных папер ініцыятыўная група Аляксандра Лукашэнкі, праз некалькі дзён яна была зарэгістраваная. Пры гэтым тады ж ЦВК адмовіў у рэгістрацыі дзвюм групам: старшыні руху «За Свабоду» і эксперта па рэгіянальным развіцці Народнага антыкрызіснага ўпраўлення Юрася Губарэвіча, бо ён падаў дакументы праз электронную пошту, і Аляксандра Драздова — праз адсутнасць некаторых папер.

Для вылучэння кандыдатам трэба сабраць не менш за 100 000 подпісаў. Улады традыцыйна выкарыстоўваюць для гэтага адміністрацыйны рэсурс.